સમજી ગયું છે આંગણું,

વાત સૌ સમજી ગયું છે આંગણું, 

આખું ઘર વાંચી ગયું છે આંગણું. 
બાળપણની યાદ આવી ગઈ હશે, 

એટલે પલળી ગયું છે આંગણું. 
દ્વાર છત દીવાલ સૌ ફફડી ઊઠ્યાં, 

સહેજ જો ધ્રૂજી ગયું છે આંગણું. 
એક જણની રાહ જોઈ જોઈને, 

આખરે ઊંઘી ગયું છે આંગણું. 
એટલે ઘરમાં રહું છું ચેનથી, 

સૌ સમજ આપી ગયું છે આંગણું. 
હું સમયસર ઘર અગર પહોંચી નહીં, 

શોધમાં દોડી ગયું છે આંગણું. 
મોભના માથે પસીનો જોઈને, 

એકદમ થાકી ગયું છે આંગણું... 
                                                    -ગાયત્રીભટ્ટ